Lastashop.com í LA með íslenska hönnun

„Þetta var hugmynd sem ég var búin að ganga með lengi. Ég á svo mikið af vinum sem búa í útlöndum en fara mikið til Íslands og flestir hafa verið að kaupa sér skó og fatnað sem er íslensk hönnun og fæst bara á Íslandi. Við erum með svo frábæra hönnuði og því fannst mér tilvalið að koma þessu á framfæri hér úti.

Ég hef búið í LA í þrjú ár en áður bjó ég í London í þrettán ár. Það var ekkert meira sem beið mín í London svo ég ákvað að færa mig um set. Svo er bara yndislegt að vakna hér upp með sólina skínandi inn um gluggann,“ segir Helga Ólafsson, eigandi netverslunarinnar Lastashop, sem var opnuð í sumar.

Helga starfaði áður nánast eingöngu við fjárfestingar svo hún segir fatabransann vera skemmtilega tilbreytingu. „Sjálf er ég að framleiða þrjár línur; Kali fyrir Svölu Björgvins, Zisku eftir Hörpu Einarsdóttur og okkar eigin línu sem heitir By-Lasta eins og búðin. Sú lína er meira hversdagsfatnaður. Harpa var efst á blaði þegar ég fór að skoða íslensku hönnuðina og ég er mjög stolt yfir að hafa hana með okkur. Við stefnum á rauða dregilinn með Zisku-línuna.“ 

Helga segir markmiðið að öll hönnun í versluninni sé íslensk og hún er í engum vafa um að vefverslanir séu framtíðin. Fljótlega verði jafnvel hægt að prófa fatnaðinn „online“. Merkin sem fást í Lastashop.com verða einnig fáanleg í E-label á Íslandi frá og með miðjum september.