Blómlegi kokkurinn eldar áfram

Þáttaröðin Hið blómlega bú sló eftirminnilega í gegn á Stöð 2 síðastliðið vor, en áhorfendur kunnu vel að meta matreiðslumanninn Árna Ólaf Jónsson og frumraun hans í búskap og eldamennsku fyrir framan myndavélarnar í íslenskri sveit. Það gleður því eflaust marga að vita að nýrrar þáttaraðar er að vænta af Hinu blómlega búi í nóvember þar sem notaleg vetrarstemning mun ríkja.

Þó að Árni Ólafur hafi hreint ekki verið neinn nýgræðingur í eldhúsinu þegar Hið blómlega bú leit dagsins ljós var hann þar að þreyta frumraun sína í sjónvarpi. Hann segir að honum og leikstjóra og framleiðanda þáttanna hafi því komið viðtökurnar skemmtilega á óvart.

„Við vissum hreinlega ekki hverju við áttum að búast við. Viðfangsefnið heillaði okkur – íslenska sveitin, maturinn og hefðirnar – og töldum við að fleiri væru í svipuðum pælingum. Það reyndist rétt og erum við hæstánægð með viðtökurnar.“

Í nýju þáttaröðinni verður sem fyrr segir áhersla á vetrarlegan mat og matarhefðir.

„Við ætlum að halda áfram á svipuðum nótum og í fyrri þáttaröðinni og fylgjast með lífinu í sveitinni, kíkja í heimsókn til bænda, elda góðan mat og vinna hann sem mest frá grunni. Veturinn getur verið svo notalegur og það er margt spennandi sem hægt er að gera á þessum árstíma,“ segir Árni Ólafur.

En hvað skyldi vera eftirlætismatur sjónvarpskokksins rómaða?

„Það er enginn einn réttur í uppáhaldi hjá mér; bragðlaukarnir eru alltaf að sækjast í mismunandi hluti. Ég er í Hollandi þessa stundina og þar sem ég gisti eru epla-, plómu- og mórberjatré í garðinum og því leitar hugurinn núna í bökur og sultur. Ég nýt alls matar sem útbúinn er af natni úr fersku og góðu hráefni.“