Þrettán ára með eigið tískublogg

Ólavía Grímsdóttir er þrettán ára mær sem gengur í Foldaskóla. Þrátt fyrir ungan aldur hefur hún sterkar skoðanir á öllu sem við kemur tísku og heldur úti tískublogginu OliviaGrims. Ólavía segist hafa verið aðeins níu ára þegar tískuáhuginn kviknaði fyrir alvöru og hún byrjaði að horfa á Project Runway og fletta tískutímaritum á borð við Vogue og i-D. Hana dreymir um að starfa innan bransans og stefnir hátt.

Hvenær byrjaðir þú að hafa áhuga á tísku? „Ég held að það hafi verið stóra systir mín sem kveikti í áhuganum hjá mér, en ég var alltaf að stelast í tískublöðin hennar. Eitt kvöld þegar að ég var níu ára og systir mín þrettán horfðum við á The september Issue og eftir það höfum við sett okkur markmið að vinna innan tískugeirans. Í dag er stefnan sú sama, ég held út blogginu mínu ásamt því að taka saumanámskeið og systir mín vinnur hjá NUDE Magazine."

Tekur þú eftir því að jafnaldrar þínir séu mikið að spá í tískunni? „Jafnaldrar mínir skilgreina tísku kannski aðeins öðruvísi en ég og pæla þá öðruvísi í hlutunum. Ef ég myndi spyrja vinkonur mínar hvað væri í tísku myndi ég fá svarið „Disco Pants og Adidas peysur." Þannig flíkur eru mjög eftirsóttar meðal krakka á mínum aldri en kannski ekki beint það sem er í tísku samkvæmt tískumiðlunum."

Átt þú þér einhverja uppáhalds hönnuði? „Hérlendis eru uppáhalds hönnuðir mínir Eygló og Harpa Einars. Einnig finnst mér herralínan frá Guðmundi Jörundarsyni sjúklega flott. 
Erlendis er það Oliver Roustein sem hannar fyrir Balmain, Stella McCartney, Karl Lagerfeld og svo er Alexander Wang minn allra uppáhalds."

Hvaða tískublogg skoðar þú sjálf reglulega? „Ég fylgist með NUDE Magazine og Trendneti hérlendis. Ég skrolla yfir meira en þrjátíu erlendar síður til að ná mér í innblástur og hugmyndir fyrir bloggið mitt, þeirra á meðal eru vogue.com, style.com, elle.com og fashionista.com."

Langar þig til að starfa innan tískugeirans þegar þú verður eldri? „
Já! Stefnan er að starfa innan tískugeirans. Karl Lagerfeld er fyrirmynd líf míns, hann er einstaklega hæfileikaríkur og vinnur bæði sem fatahönnuður og ljósmyndari. Ég hef brennandi áhuga á fatahönnun og ljósmyndun og langar að verða eins og hann."

Blogg Ólavíu er hægt að skoða hér.