Í efri mörkum með brot af markaðnum

Hlutur Íslands á markaði skemmtiferðaskipa í Evrópu nam 0,7 prósentum, samkvæmt tölum sem norski ferðavefurinn Boarding.no hefur tekið saman.

Árið 2012 sóttu landið heim 204 þúsund gestir með skemmtiferðaskipum. Til samanburðar má nefna að ríflega helmingi fleiri notuðu þennan ferðamáta til að heimsækja Danmörk og Svíþjóð. Noregur ber svo höfuð og herðar yfir önnur Norðurlönd þessum efnum með 2,5 milljónir gesta.

Þá kemur fram í umfjöllun Boarding.no að langmestu vöxtur sé í þessari tegund ferðamennsku í Noregi. Á meðan fjöldi gesta skemmtiferðaskipa jókst í fyrra um 16 prósent í Evrópu þá var aukningin 28 prósent í Noregi.

Ólafía Sveinsdóttir, deildarstjóri skipadeildar ferðaskrifstofunnar Atlantik, segir þróunina hér í þá átt að skipin sem hingað komi séu stærri, þótt komum skipa hafi ekki fjölgað mjög. „En þessi þróun hefur haft í för með sér mikla fjölgun ferðamanna í heild,“ segir hún. 

Áður voru hér algeng skip sem tóku færri en þúsund farþega. „Núna sjáum við þessar stóru tölur, frá þetta tólf og fjórtán hundruð farþegum og allt upp í þrjú þúsund farþega skip,“ segir Ólafía. 

Að auki sé svo vöxtur í minni lúxusskipum sem taki hundrað til tvöhundruð farþega. „Við erum með nokkur þannig lúxusskip sem flokkast allt upp í sex stjörnur.“

Þó að eftir miklu sé að slægjast á risastórum markaði skemmtiferðaskipa í Evrópu þar sem markaðshlutdeild Íslands er lítil, þá segir Ólafía að aðstæður hér setji okkur nokkrar skorður hvað varði auknar komur skipa.

„Hér er skipatímabilið mjög stutt,“ segir Ólafía og bendir á að það nái í raun bara yfir júní, júlí og ágúst og fram í september, þótt unnið sé í því að fjölga ferðum hingað í maí. „Og það eru dagar sem eru þannig að skipin eru of mörg í einu.“ 

Sums staðar nálgist landið því efri mörkt í getu til að taka á móti skemmtiferðaskipum. 

„Það þýðir ekkert að fá þennan fjölda til landsins nema að hægt sé að bjóða þeim upp á þá þjónustu sem gestirnir vilja fá.“ Þannig þurfi að vera til staðar rútur og leiðsögumenn, veitingastaðir og önnur afþreying sem annar fjöldanum. 

„Og á sumum dögum erum við komin algjörlega að þolmörkum.“