Lögreglan lýstir eftir konunum sem komu Guðjóni til aðstoðar

Lögreglan á höfuðborgarsvæðinu óskar eftir að ná tali af tveimur konum sem komu Guðjóni Guðjónssyni til aðstoðar á Nýbýlavegi í Kópavogi laugardaginn 12. janúar sl. í kjölfar þess að bíl hans, svörtum Mercedes Benz með skráningarnúmerinu B 747, var stolið.

Þetta var um fimmleytið áðurnefndan dag en Guðjón tilkynnti sjálfur um málið til lögreglu símleiðis. Hún fór þegar á staðinn en þá voru konurnar farnar af vettvangi, en hann kvartaði hins vegar undan eymslum eftir átök við bílþjófinn og var í framhaldinu fluttur á slysadeild. Hafi aðrir orðið vitni að því þegar bílnum var stolið eru hinir sömu einnig beðnir um að hafa samband við lögregluna í síma 444-1000 en jafnframt má senda upplýsingar í tölvupósti á netfangið abending@lrh.is.

Ómar Smári Ármannsson, aðstoðaryfirlögregluþjónn, sagði í samtali við Vísi í dag að ekkert liggifyrir um tengsl ránsins og andláts Guðjóns fjórum dögum eftir árásina. Málið sé því ekki rannsakað sem manndrápsmál sem stendur.

„Upphaf málsins má rekja til þess að skömmu áður, eða á fimmta tímanum þennan fyrrnefnda dag, ók maðurinn austur Hverfisgötu í Reykjavík en þar kom karl á þrítugsaldri inn í bílinn. Mennirnir urðu síðan samferða á Nýbýlaveg í Kópavogi en eftir að þangað var komið kom til einhverra átaka og orðaskipta.

Þeim lauk með því að yngri maðurinn hrifsaði bíllyklana af þeim eldri og ók á brott. Bíllinn fannst nokkrum dögum seinna og var karl á þrítugsaldri þá handtekinn í þágu rannsóknarinnar. Reyndist það vera sami maður og hafði þegið far hjá þeim eldri laugardaginn 12. janúar og farið með honum í Kópavog. Viðkomandi hefur játað að hafa stolið bílnum," segir í tilkynningu frá lögreglu.