Britney Spears í Las Vegas

Poppstjarnan Britney Spears hefur gert tveggja ára samning við Caesars Entertainment um að koma fram á tónleikaröð á Planet Hollywood-hótelinu í Las Vegas.



Söngkonan, sem flutti okkur smelli á borð Baby One More Time og Toxic, mun koma fram á fimmtíu tónleikum ári og hefst tónleikaröðin 27. desember næstkomandi.



Í viðtali við sjónvarpsþáttinn Good Morning America sagðist söngkonan njóta þess að vera í Las Vegas og að þar væri mikil orka. Hún hyggst flytja alla sína helstu smelli á tónleikaröðinni en muni einnig taka nýtt efni.



Með þessu fetar hin 31 árs gamla Spears í fótspor listamanna á borð við Celine Dion og Elton John, sem bæði hafa gert sams konar samninga. Ekki hefur komið fram hversu háa upphæð söngkonan fær fyrir vinnu sína en talið er að Dion hafi hlotið um 12 milljarða króna að launum fyrir þriggja ára samning.