Fjalla-Steini gengur á öll bæjarfjöll landsins fyrir krabbameinssjúka

„Ég byrjaði að ganga fyrir Ljósið, sem er endurhæfingarstöð fyrir krabbameinssjúka, en svo breytti ég til. Nú er ég að vinna að bók um fjöllin og göngurnar og mun gefa höfundarlaun mín til krabbameinssjúkra barna,“ segir Þorsteinn Jakobsson, göngugarpur og höfundur bókarinnar Íslensk bæjarfjöll sem kemur út næsta sumar. „Markmiðið er að ganga hvert einasta bæjarfjall og sýslu á landinu til að tengja landið saman.“

Bókin verður byggð upp á leiðarvísum um landið en Þorsteinn segist ekki vilja eigna sér heiðurinn að bókinni þar sem hann fær aðstoð ýmissa aðila. Tveir jarðfræðingar skrifa meðal annars í bókina og í kringum tíu ljósmyndarar alls staðar af landinu myndskreyta. 

Þorsteinn er lærður leiðsögumaður og meðlimur gönguhópsins Fjallagarpar og gyðjur en hópurinn telur um þrjú þúsund manns.

Hann segir að fleiri tugir fólks hafi lagt honum lið í göngunum undanfarin ár. „Mér líður hvergi eins vel og úti í náttúrunni og svo langaði mig bara að láta gott af mér leiða og minna fólk á að vera jákvætt. Ég gef allt sem ég safna en ég lét einnig búa til eitt þúsund söfnunarbauka sem dreift er víðs vegar um landið í göngunum. Ég á núna aðeins eftir að ganga níu fjöll á landinu til að klára bókina.“

Þorsteinn hefur góða þekkingu á hálendinu en hann er lærður leiðsögumaður. Hann segir að í framhaldi af þessu verkefni muni hann uppfylla gamlan draum og ganga á Kilimanjaro, hæsta fjall Afríku. Hann stefnir á að ganga á hæstu fjöll allra heimsálfanna.