Skortir fjármagn til að stöðva eyðingu

Forsætisráðuneytið fer fram á 130 milljóna aukafjárveitingu til verndunar og uppbyggingar á Þingvöllum. Verði hún ekki afgreidd er rætt um gjaldtöku á svæðið. Óttast er að vaxandi ágangur ferðamanna, allt árið um kring skilji Þingvelli eftir sem flakandi sár og víða er jarðvegurinn farinn að láta á sjá og drullusvað myndast á göngustígum.

„Það hefur verið reynt að bregðast við en Þingvellir fengu fremur snautlega afgreiðslu úr fjárfestingaáætlun ríkisstjórnarinnar. Af þeim 750 milljónum sem veitt var í uppbyggingu við ferðamannastaði fengum við um sextíu. Til viðbótar fengum við svo tuttugu milljónir gegn því að leggja tuttugu á móti. En það er ekki nóg,“ segir Álfheiður Ingadóttir, formaður Þingvallanefndar.

Erna Hauksdóttir, formaður Samtaka ferðaþjónustunnar, segir 60 milljónir góða byrjun en ljóst sé að ráðast þurfi í að bæta verulega í alls staðar við verndun vinsælla ferðamannastaða.

„Auðvitað hefði átt að vera löngu búið að setja pening í þetta drullusvað sem orðið er, en það þýðir ekki að horfa í bakspegilinn. Við höfum lýst yfir vilja til að vinna að aðgerðapakka með nýrri ríkisstjórn. Við erum öll í sama liðinu þegar kemur að þessum málum. Við viljum öll það sama,“ segir Erna.

Nokkuð hefur verið rætt um gjaldtöku inn á Þingvelli og aðra vinsæla staði. Hugmyndin er þó umdeild. Álfheiður segir gjaldtökuna ekki raunhæfa. „Menn hafa rætt þetta sín á milli en mér hugnast það ekki. Mín sýn er að borgað sé fyrir þjónustu á svæðinu líkt og við þekkjum við veiðar og í Silfru. Það hefur gefist ágætlega og við náð að tvöfalda sértekjurnar þrátt fyrir niðurskurð. Þannig getum við boðið upp á aukna þjónustu á svæðinu.“

Erna segist hlynnt gjaldtöku í einhverjum skilningi. Skerpa verði þó á útfærslum. „Við verðum að vanda okkur við að finna lausn. Okkur hefur hugnast betur að selja náttúrupassa þar sem gjald er greitt um ákveðin svæði. Okkur hugnast hins vegar ekki að hafa posa við hvern foss. Enda er slíkt líka kostnaðarsamt. Eðlilegast er að að ríkið komi til móts með peninga í viðeigandi hlutfalli við skatttekjur ferðaþjónustunnar sem hafa aukist verulega.“

maria@frettabladid.is