Misskilningur að höfuðborgarbúar greiði fyrir landsbyggðina

Formaður Orkusetursins segir að verðmunur við kyndingu húsa á köldum svæðum og annar staðar hafi vaxið mjög undanfarin ár. Allt að 278% munur var á hæsta og lægsta kostnaði við að hita upp meðalstórt íbúðarhúsnæði á ári á landinu í fyrra.

10% þjóðarinnar búa á svokölluðum köldum svæðum þar sem ekki er jarðhiti og hitaveita. Kostnaður við kyndingu er mun meiri á slíkum stöðum en annarsstaðar.

Í fréttaskýringu um málið sem birtist í Morgunblaðinu á föstudag, kemur fram að árlegur kostnaður við að hita upp meðal stórt hús með rafkyndingu þar sem kostnaður er mestur var rúmlega 208 þúsund krónum árið 2011. Tekið skal fram að sú upphæð sem fengin eftir að búið er að reikna með niðurgreiðslu ríkisins á kostnaðinum.

Reykjavík, þar sem orkukostnaður er lægstur, myndi hins vegar kosta tæpar 75 þúsund að kynda sams konar hús upp eða 133 þúsund krónum minna en á kalda svæðinu.

Frumvarp um jöfnun húshitunarkostnaðar hefur verið lagt fram á Alþingi, en það byggir á tillögum nefndar sem ríkisstjórnin skipaði á síðasta ári.

Verði það samþykkt óbreytt myndi kostnaður við að kynda meðalstóra húsið á kaldasvæðinu sem áðan var tekið dæmi ekki verða 208 þúsund á ári heldur um 140 þúsund.

Það jafngildir því nær 50 prósenta lækkun á húshitunarkostnaði fyrir þá sem hafa greitt hvað mest.

Sigurður Friðleifsson er framkvæmdastjóri Orkusetursins sem vann að gerð skýrslu starfshópsins sem frumvarpið byggir á.

„Þetta snýst um að minnka aðeins muninn á kostnaðinum," segir Sigurður en hann segir kostnaðinn hafa aukist mikið undanfarin ár.

Sigurður segir að misskilnings hafa gætt í umræðunni um að höfuðborgarbúar eigi niðurgreiða húshitun fyrir landsbyggðina.

„Mér finnst þetta alls ekki rétt framsetning. Íslendingar eru svo ótrúlega heppnir að um 90 prósent íbúana, út um allt land, búa við umhverfisvænan og ódýrasta húshitunarkost sem er jarðvarminn. En 10 prósent hafa ekki aðgang að honum og þetta snýst um að draga ögn úr kostnaðinum hjá þeim ennfrekar. Það eru jarðvarmaveitur út um allt land."