Aron skoraði og AGF lagði Bröndby

Aron Jóhannsson skoraði eitt marka AGF sem lagði Bröndby í dönsku úrvalsdeildinni í knattspyrnu í dag.

Heimamenn höfðu 1-0 forystu í hálfleik og forystan tvöfaldaðist með marki Arons eftir stundarfjórðungsleik í síðari hálfleik.

AGF bætti við þriðja markinu skömmu síðar en gestirnir minnkuðu muninn áður en yfir lauk. Aroni var skipt af velli stundarfjórðungi fyrir leikslok.

AGF hefur fimm stig að loknum fjórum umferðum og er um miðja deild. FC Kaupmannahöfn, sem lagði Esbjerg 2-1 á útivelli í gær, er í toppsætinu með tíu stig.

Arnór lagði upp mark Esbjerg. Ragnar Sigurðsson spilaði allan leikinn í vörn FCK en Sölvi Geir Ottesen sat á bekknum.