Snorri og Róbert hvíldu í morgun | Aron með

Íslenska handboltalandsliðið æfði snemma í morgun í æfingahöllinni í Lundúnum en tveir leikmenn sátu þó hjá vegna meiðsla og veikinda.

Snorri Steinn Guðjónsson er enn að glíma við sinaskeiðabólgu og línumaðurinn Róbert Gunnarsson við smávægileg veikindi.

Góðu tíðindin eru þó þau að Aron Pálmarsson var með af fullum krafti á æfingunni og var það í fyrsta sinn í tvær vikur sem hann gat gert það.

„Við vorum að fá Aron fyrst núna inn á alvöru æfingu og þó svo að hún hafi ekki verið löng var hann að fíla sig vel. Það er svo önnur æfing á morgun og þá sjáum við betur hvernig þetta gengur," sagði Guðmundur Guðmundsson, landsliðsþjálfari.

Það eru hins vegar ekki góð tíðindin af Snorra Stein sem hefur verið með sinaskeiðbólgu í vinstri höndinni.

„Bólgan er nú komin yfir í hægri höndina sem er ekki gott. Þetta er ekki staðan sem við vildum vera í en svona er þetta bara," sagði Guðmundur.

Sjálfur sagði Snorri að hann ætli sér að vera með á sunnudaginn en þá mætir íslenska liðið því argentínska. Viðtal við hann og fleiri íslenska landsliðsmenn birtast á Vísi síðar í dag.