"Ég er bara ánægður að hafa komið einhverjum til bjargar"

„Auðvitað er það góð tilfinning þegar maður hefur komið einhverjum til bjargar - það er ekki spurning," segir Kristján Ingi Kristjánsson, sem bjargaði konu sem fékk hjartastopp á bílaplani við N1 í Hveragerði í byrjun mánaðarins.

Bryndís Vilbergsdóttir, systir konunnar, lýsti eftir bjargvættinum á Facebook á dögunum og einnig á Vísi í morgun. Félagar Kristjáns sáu fréttina á Vísi og létu hann vita að verið væri að leita að honum og hafði hann samband við Bryndísi í kjölfarið.

„Ég var með fjölskylduna í sunnudagsbíltúr og ætlaði í heimsókn í sumarbústað þarna á svæðinu þegar ég sá mann þarna draga konu úr farþegasætinu út á stétt. Konan var greinilega búin að missa meðvitund en andaði. Svo stuttu síðar blánaði hún og hætti að anda og þegar ég fann engan púls þá hóf ég hjartahnoð og blástur," segir Kristján Ingi.

Sjúkraflutningamenn komu svo á vettvang um tíu mínútum síðar og hélt Kristján áfram að hnoða í stutta stund eftir að þeir komu. Konan var svo flutt á gjörgæslu með sjúkrabíl. Hún hefur verið útskrifuð þaðan og er nú sem stendur á hjartadeild þar sem hún hefur náð ótrúlegum árangri.

Kristján Ingi starfar sem lögreglumaður og lærði skyndihjálp í lögregluskólanum fyrir um tuttugu árum. Hann segist þó hafa sótt endurmenntunarnámskeið á undanförnum árum þar sem skyndihjálpin er rifjuð upp.

Hann segir það undir fjölskyldunni komið hvort að þau hittist en hann hefur einungis rætt við fjölskylduna í gegnum síma í morgun. „Ég veit hvaða fólk þetta er núna og það er undir þeim komið hvað þau vilja gera. Ég er bara ánægður að hafa komið einhverjum til bjargar," segir hann.

Og hann vill hvetja fólk til þess að sækja skyndihjálparnámskeið. „Ég hvet fólk til þess að sækja námskeið í skyndihjálp. Maður þarf kannski að beita þessu oft en ef maður þarf þess þarf maður að kunna réttu handtökin," segir hann að lokum.