Trúnaðurinn rofinn á milli þings og Ríkisendurskoðunar

Ríkisendurskoðun fær fjáraukalögin ekki til umsagnar vegna trúnaðarbrests á milli Ríkisendurskoðunar og Alþingis. Starfsmaður stofnunarinnar kom gögnum til Kastljóss, að sögn formanns fjárlaganefndar.

Sveinn Arason ríkisendurskoðandi vísar því alfarið á bug að hann beri ábyrgð á trúnaðarbresti sem hafi orðið á milli Ríkisendurskoðunar og Alþingis. Meirihluti fjárlaganefndar Alþingis samþykkti á fundi sínum í gær að senda fjáraukalög næsta árs ekki til Ríkisendurskoðunar, eins og venja er, og bar meðal annars við trúnaðarbresti.

„Ég hef ekki brotið trúnað gagnvart þeim,“ segir Sveinn. „Það er nefndin sem býr til þennan trúnaðarbrest, ekki ég. Það hefur aldrei verið trúnaðarbrestur á milli Ríkisendurskoðunar og fjárlaganefndar.“

Sveinn vildi ekki svara þeirri spurningu hvort hann hygðist segja af sér í ljósi þeirrar gagnrýni sem Ríkisendurskoðun hefur sætt undanfarna daga síðan Kastljós greindi frá skýrsludrögum stofnunarinnar um útgjöld ríkisins vegna Oracle, bókhalds- og mannauðskerfi ríkisins.

Björn Valur Gíslason, formaður fjárlaganefndar, segir ákvörðunina til komna vegna þeirra gagna sem komið hafa í ljós á undanförnum dögum og hafa verið til hjá Ríkisendurskoðun árum saman. „Þau eru býsna þung og alvarleg. Það var rekið á eftir því að fá þau gögn í hendur og alltaf voru þau „rétt að koma“. Svo er það á endanum einhver starfsmaður stofnunarinnar sem fær bara nóg og ákveður að láta fjölmiðla fá þessi gögn sem reynast síðan býsna alvarleg. Það er trúnaðarbrestur fyrir þingið sem fól Ríkisendurskoðun þessa vinnu.“

Björn Valur ætlast til þess að forsætisnefnd Alþingis taki málið fyrir hið fyrsta, en Ríkisendurskoðun heyrir undir hana.

„Það er ekki hægt að búa við að traust ríki ekki á milli ríkisstofnana og Alþingis,“ segir hann. Ákvörðun nefndarinnar muni ekki tefja vinnuna við fjáraukalögin. Henni verði annaðhvort skilað án umsagnar Ríkisendurskoðunar, eða með hennar áliti, breytist forsendurnar þannig að trausti verði á ný komið á.

„Það er enn mörgum spurningum ósvarað í þessu máli og við munum halda áfram að leita svara við þeim.“ sunna@frettabladid.is