Innflutningsbann á jólatré?

Nýr átusveppur sem greinst hefur í Danmörku og Noregi gæti orðið til þess að innflutningur á normannsþin verði bannaður. Átan gæti ógnað hér allri garð- og skógrækt. Nefnd endurskoðar reglur um plöntuinnflutning.

Skógfræðingar leggja til bann við innflutningi á jólatrjám vegna áður óþekkts átusvepps sem leggst á þin í Danmörku og Noregi. Innfluttur normannsþinur stendur hér undir allt að 80 prósentum af jólatrjáasölu.

„Með áframhaldandi innflutningi á þin til Íslands er það ekki spurning hvort heldur hvenær sjúkdómurinn skýtur upp kollinum í íslenskum þinskógum,“ segir í samantekt tveggja sérfræðinga Skógræktar ríkisins um málið, þeirra Brynjars Skúlasonar og Halldórs Sverrissonar. Brynjar er sérfróður um skógerfðafræði og erfðavistfræði og Halldór um plöntusjúkdóma og kynbætur trjáa.

Halldór segir átusveppinn af ættkvíslinni Neonectria en tegundin sé óviss. Gróhirslur sveppsins séu í klösum af rauðum vörtum sem sprengi sig út úr berkinum.

„En þetta er svo nýtilkomið og ekki mikið vitað enn þá,“ segir hann. Hins vegar hafi þinurinn hingað til verið talinn mjög heilbrigður og lítil hætta vegna sjúkdóma eða meindýra sem fylgt gætu jólatrjám. Þinur var því ekki á bannlista eins og aðrar ættkvíslir barrtrjáa í ræktun þegar reglugerð um inn- og útflutning á plöntum tók gildi árið 1990. „En það gæti breytt málinu ef þetta reynist eitthvað sem máli skiptir.“

Vísbendingar eru um að átusveppurinn leggist á fleiri tré, svo sem á rauðgreni. „Reynist svo vera þá er þetta mjög alvarlegt mál vegna þess að miklu meira er í húfi.“ Halldór bendir á að rauðgreni sé annað aðaljólatré landsins. „Hitt er stafafuran.“

Þá bendir Brynjar á að leggist sveppurinn á fleiri tré en þin geti það haft áhrif á alla garð- og skógrækt hér á landi.

Halldór og Brynjar eru sammála um að rétt væri að banna innflutning á normannsþin, í það minnsta tímabundið þar til í ljós kemur hversu mikil hætta stafar af átunni. „En því verður náttúrulega ekki komið á strax, til þess vitum við ekki enn nógu mikið. En hugsanlega gæti verið komið bann fyrir næstu jól, ef þetta reynist svona skæður sjúkdómur,“ segir Halldór og bendir á að nú standi yfir endurskoðun á reglugerðinni um innflutning plantna hjá nefnd í atvinnu- og nýsköpunarráðuneyti.- óká