Gaf lögin sín í bandaríska mynd

Ingólfur Þór Árnason, úr hljómsveitinni Indigó, var fenginn til að sjá um tónlistina fyrir bandarísku kvikmyndina About Sarah í leikstjórn Elenor Gaver. Myndin, sem er sannsöguleg, gerist í New York og fjallar um nítján ára stúlku sem lést af völdum eiturlyfja.

„Ég var að smíða leikmynd í Noah-myndinni fyrir True North. Það var haldið partí þegar tökurnar voru að hefjast og þar hitti ég Sam sem er prófessor og kennir myndlist í Yale,“ segir Ingólfur Þór, spurður út í tilurð verkefnisins. „Ég lét hann fá „demó“ af nýjustu plötunni sem ég er að taka upp, því við vorum ágætis félagar. Hann lætur konuna sína hafa það, sem þekkir þennan leikstjóra úti í New York.“

Ingólfur Þór fékk skömmu síðar bréf frá Elenor Gaver og ákvað í framhaldinu að láta hana fá lögin af plötunni sinni endurgjaldslaust. „Mér fannst þetta skemmtilegt verkefni. Það eru ungir krakkar að leika í þessu, vinir þessarar stelpu sem lést af völdum heróíns, og þetta var gert fyrir lítinn pening.“

Fimm lög frá Indigó hljóma í myndinni. Hún er í eftirvinnslu og verður tilbúin um miðjan desember. Á næsta ári verður hún sýnd á kvikmyndahátíðunum í Berlín, Sundance og víðar.

Ingólfur Þór er búinn að sjá grófklippta útgáfu myndarinnar og leist vel á. „Ég sýndi fimmtán ára dóttur minni myndina og henni fannst hún fín. Þá er ég ánægður.“

Öll lögin verða á plötu Indigó sem kemur út næsta vor en sú síðasta kom út fyrir fimm árum. Upptökustjóri er Halldór Björnsson úr hljómsveitinni Legend. - fb