Taka kröfur stúdenta alvarlega

Katrín Jakobsdóttir, mennta- og menningarmálaráðherra, og Oddný G. Harðardóttir, fjármálaráðherra, kynntu kröfur stúdenta í ríkisstjórn í morgun. Stúdentaráð Háskóla Íslands stóð í gær fyrir gjörningi fyrir utan Alþingishúsið og afhenti ráðherrunum tveimur um 3000 póstkort frá nemendum í HÍ.

Sútdentar krefjast þess að Háskóli Íslands fái greitt með öllum nemendum sem stunda nám við Háskólann, en eins og stendur má ætla að um 520 nemendur stundi nám við háskólann án þess að ríkið greiði með þeim.

„Við kynntum þessar kröfur á ríkisstjórnarfundi í morgun," segir Katrín Jakobsdóttir. „Mér finnst þessi krafa ekki ósanngjörn," bætir hún við og útskýrir að það hafi verið ráðstöfun vegna kreppunnar að borga ekki með öllum nemendum í háskólanum. Hún vonast til þess að málið verði tekið fyrir og rætt milli umræðna um fjárlagafrumvarpið á Alþingi.

„Ég lofa engum niðurstöðum en þetta gerist alla vega ekkert alveg strax," segir hún en undirstrikar að ríkisstjórnin taki kröfur stúdenta alvarlega og hlusti á þær. Það verði hins vegar að ráðast hvert svigrúmið er til hækkana.