Þriðji aðili fær aldrei upplýsingar

Kínverska fjarskiptatæknifyrirtækið Huawei tekur öryggismál afar alvarlega, að því er fram kemur í yfirlýsingu Kenneths Fredriksen, aðstoðarsvæðisforstjóra Huawei í Mið- og Austur-Evrópu auk Norðurlanda.

Með yfirlýsingunni bregst Fredriksen við fréttaflutningi af skýrslu bandarískrar þingnefndar sem í liðinni viku varaði við því að bandarísk fyrirtæki ættu viðskipti við Huawei. Vegna tengsla við Kína vill þingnefndin meina að fyrirtækinu sé ekki treystandi fyrir uppbyggingu fjarskiptakerfa vestra.

Orðspor Huawei er hins vegar gott, bæði hvað varðar tækni og þjónustu, líkt og íslensk fjarskiptafyrirtæki sem nota búnað frá Huawei hafa vitnað um. Fredriksen bendir á að öryggi upplýsingatækni sé lykilatriði í hönnun og þróun tækjabúnaðar fyrirtækisins.

„Huawei notar stöðluð ferli til að takast á við öryggisvá í upplýsingatækni. Upplýsingaöryggi er þannig hluti af kjarnahugsun fyrirtækisins,“ segir hann og bendir á að vörur Huawei og lausnir séu í notkun hjá fjarskiptafyrirtækjum á öllum Norðurlöndum, og raunar um heim allan.

„Huawei hefur ekki, og mun aldrei, hætta stöðu sinni og árangri, eða öryggi upplýsingakerfa viðskiptavina sinna með því að veita þriðja aðila aðgang að upplýsingum. Hvorki ríkisstjórnum, né neinum öðrum,“ segir Kenneth Fredriksen. - óká