Steingrímur vill að Sjálfstæðisflokkurinn fái frí næstu fjögur ár

Bjartsýni landsmanna hefur vaxið mánuði frá mánuði, ef marka má mælingar þar um, sagði Steingrímur J. Sigfússon atvinnuvegaráðherra á Alþingi í dag. Hann sagði að sumarið hefði verið hagfellt. „Strandveiðarnar hleyptu lífi í þorpin við sjávarsíðuna og erlendir ferðamenn streymdu til landsins í meiri fjölda en nokkru sinni," sagði Bjarni meðal annars. Nú væri þessu góða sumri lokið með harkalegum hvelli.

Steingrímur sagði að útlitið framundan væri mun betra en fyrst eftir hrunið. Ástandið í Evrópu væri þó hættulegt. „Einn mesti skuggi sem nú fellur á annars ágætar framtíðarhorfur Íslands eru efnahagserfiðleikar umheimsins og hættan á að þeir smiti í auknum mæli til okkar gegn um versnandi viðskiptakjör og minnkandi kjark til fjárfestinga. Evrópa og einkum evruríkin eiga í miklum erfiðleikum sem Ísland skiptir miklu hvernig úr vinnst. Mikilvægt er að jafnt umræðan um vanda Evrópu sem og sú umræða sem við Vinstri græn teljum nú brýnt að fari fram um stöðu mála hvað varðar viðræður okkar við Evrópusambandið verði á málefnalegum og uppbyggilegum nótum," sagði Steingrímur.

Þá sagði hann að Sjálfstæðisflokkurinn þyrfti að fá frí frá ríkisstjórn í fjögur ár í viðbót. „Ég tel að aðrir flokkar og framboð í landinu eigi að sameinast um að bjóða Sjálfstæðisflokknum upp á fjögur ár í viðbót hið minnsta til endurhæfingar og sjálfsskoðunar sem enn virðist, vel að merkja, ekki hafa farið fram. Á þeim tíma mæli ég með að við verðum góð við Sjálfstæðisflokkinn, umburðarlynd og skilningsrík, veitum honum skjól til að finna fjölina sína og kannski veður hann þá aftur stjórntækur, sæmilega víðsýnn flokkur með svolitlu félagslegu eða húmanísku ívafi og fær um að bera aftur ábyrð á efnahagsmálum án þess að stofna okkur í stórhættu," segir Steingrímur.