Smithætta frá hreindýrum aldrei sönnuð

Yfirdýralæknir útilokar að flytja hreindýr á Vestfirði vegna smithættu. Hópur áhugamanna segir fullyrðingar um smithættu ósannaðar og hyggur á rannsóknir. Gríðarleg tækifæri eru talin fylgja nýjum hreindýrastofni vestra.

Hópur áhugamanna um að koma upp hreindýrastofni á Vestfjörðum vill fá úr því skorið með rannsóknum hvort flutningi dýranna frá Austurlandi fylgi smithætta sauðfjársjúkdóma. Yfirdýralæknir útilokar flutning dýranna milli landshluta einmitt með þeim rökum, auk þess sem hann telur um dýraverndunarmál að ræða.

Sigmar B. Hauksson, fyrrverandi formaður Skotvíss, er einn áhugamanna um flutning hreindýra frá Austurlandi til Vestfjarða. Hann bendir á, fyrst af öllu, að meginrök yfirdýralæknis hafi aldrei verið sönnuð með rannsóknum. „Rökin eru að hreindýr gætu borið með sér sauðfjársjúkdóma. Það stendur ekkert að baki þessum fullyrðingum. Okkar vinna gengur því út á að fá úr því skorið hvort þetta sé gerlegt, og fjölmörg rök benda í þá átt.“

Halldór Runólfsson, yfirdýralæknir, segir að sín skoðun varðandi flutning dýranna hafi ekkert breyst hvað varðar sjúkdómahættuna. „En þetta byggir einnig á dýraverndarsjónarmiðum, því almennt held ég að menn telji að Vestfirðir henti ekki hreindýrum. Það er því dýraverndarmál að flytja dýrin á svæði þar sem þau ekki þrífast.“ Spurður um rannsóknaþáttinn telur Halldór að marktæk rannsókn á sjúkdómum í hreindýrum yrði dýr og tímafrek aðgerð, þar sem það taki langan tíma að koma í ljós hvort sjúkdómarnir séu fyrir hendi í dýrunum.

Í dag sækja 4.000 skotveiðimenn um að fá að fella þúsund hreindýr á Austurlandi, þannig að eftirspurnin er mikil. „Kostirnir við að fjölga hreindýrum eru því ekki síst að slík aðgerð væri atvinnuskapandi,“ segir Sigmar. „Hvert dýr skilar í beinar og óbeinar tekjur um 300.000 krónum og helmingi meira ef um erlenda veiðimenn væri að ræða. Þetta myndi því styrkja ferðaþjónustu á til dæmis Vestfjörðum í um tvo mánuði utan hins hefðbundna ferðamannatíma.“

Sigmar, sem hafnar því að Vestfirðir henti ekki hreindýrum, segir um aðferðafræði rannsóknarinnar að sýnum yrði safnað í sumar, en upplýsingar um gróðurfar liggi að hluta til fyrir. Síðan yrði að flytja nokkur dýr vestur þar sem þau yrðu sett í einangrun. „Þegar sannað væri að þau væru heilbrigð yrði þeim sleppt og nýjasta tækni notuð til að ganga úr skugga um hvernig þeim reiðir af í náttúrunni. Þetta yrðu fyrstu skrefin.“svavar@frettabladid.is