Víkingur Ó færist nær Pepsi-deildinni | ÍR fallið

Víkingur frá Ólafsvík er kominn með annan fótinn í Pepsi-deild karla eftir 1-0 sigur á ÍR í dag. ÍR-ingar eru fyrir vikið fallnir úr 1. deildinni.

Víkingur er með 38 stig í öðru sæti deildarinnar, sex stigum á undan næsta liðí þegar tvær umferðir eru eftir. Liðið þarf því eitt stig úr síðustu tveimur leikjunum til að tryggja sæti sitt í deildinn.

KA er í þriðja sæti deildarinnar en liðið mætir einmitt Víkingi Ó í næstu umferð.

Leiknir vann svo afar mikilvægan sigur á BÍ/Bolungarvík, 2-1, og hélt því vonum sínum um að halda sæti sínu í deildinni á lífi. Leiknir er með nítján stig, tveimur stigum frá öruggu sæti.

Víkingur R vann svo 1-0 sigur á Þrótti. Bæði lið eru um miðja deild með 27 stig hvort. BÍ/Bolungarvík er í níunda sæti með 22 stig, einu meira en Höttur, en fram undan er hörð fallbarátta í báðum liðum.

Þess má geta að Höttur og Leiknir mætast á laugardaginn, þegar næstsíðasta umferðin fer fram, í afar mikilvægum leik í botnbaráttunni.

Úrslit dagsins:

Víkingur Ó - ÍR 1-0

1-0 Guðmundur Magnússon (36.)

Leiknir - BÍ/Bolungarvík 2-1

1-0 Hilmar Árni Halldórsson (44.)

2-0 Óttar Bjarni Guðmundsson (46.)

2-1 Ingimar Elí Hlynsson (83.)

Þróttur - Víkingur R 0-1

0-1 Viktor Jónsson (19.)

Markaskorarar frá úrslit.net.