Veður fer versnandi á Vestfjörðum

„Nóttin var nokkuð róleg hjá okkur," segir Reimar Vilmundarson hjá Björgunarsveitinni Erni í Bolungarvík. Óveður geisar nú á Vestfjörðum og eru vegir meira eða minna lokaðir eða ófærir. Í nótt náði vindhraði víða þrjátíu metrum á sekúndu og í vindhviðum náði hann allt að fimmtíu metrum á sekúndu.

Útköll Björgunarsveitarinnar Ernis hafa verið af ýmsum toga. Þakplötur losnuðu af einu húsi, ruslatunnur hafa fokið og flotbryggja losnaði. „Það fylgja alltaf einhver verkefni í hávaðaroki," segir Reimar. Hann tekur fram að björgunarsveitin verði í viðbragðsstöðu fram eftir degi.

Reimar segir veðrið hafa versnað töluvert í morgun. „Maður veit ekki hvort að hámarkinu hefur verið náð. En það hvessti í morgun og snjókoman er nú að aukast eitthvað."

Gert er ráð fyrir að óveðrið nái hámarki um miðjan dag. Er fólki ráðlagt að halda sig heima er unnt er.