Tilnefnd til þýskra barnabókmenntaverðlauna

„Þetta er fyrsta stóra barnabókaverkefnið mitt," segir Rán Flygenring sem nýlega var tilnefnd til þýsku barnabókmenntaverðlaunanna fyrir bókina Frerk, du Zwerg!

Rán er grafískur hönnuður og myndskreytir og hefur unnið í alls kyns verkefnum síðustu ár. Myndskreytingarnar hafa þó verið fyrirferðamestar á teikniborðinu að undanförnu, og sá hún um allar myndskreytingar í Frerk, du Zwerg! sem kom út síðastliðið haust. Höfundur bókarinnar er hinn þýski Finn-Ole Heinrich sem Rán kynntist í gegnum verkefni sem hann vann með íslenskum listamönnum í tengslum við bókamessuna í Frankfurt árið 2011, þar sem Ísland var heiðursgestur.

Verðlaunin sem um ræðir nefnast Deutsche Jugendliteraturpreis og hafa þau verið veitt af þýska ríkinu frá árinu 1956. „Þetta eru ein aðal barnabókaverðlaunin í Þýskalandi, svo þetta er auðvitað mikill heiður," segir Rán.

Verðlaunin verða veitt á bókamessu í Frankfurt 13 október næstkomandi, svo Rán þarf að bíða nokkuð með að heyra úrslitin. En hvað er á döfinni þar til þá? „Það verður bara að koma í ljós. Ég er stödd á tíbesku viðarpanelhóteli í Darjeeling núna, en ég er að ferðast um Indland og skoða landið og vinna. Næst fer ég til Kalkútta og svo til Dehli. Þetta er alveg æðislegt, Indland er endalaus uppspretta af allskonar," segir Rán að lokum. - trs