Vill að fundargerðir ríkisstjórnar um félag Nubos verði opinberaðar

Lilja Mósesdóttir, alþingismaður, óskar eftir því að fundargerðir ríkisstjórnarinnar frá fundi þar sem fjallað var um stofnun íslensks félags í eigu Huang Nubo verði gerðar opinberar. Ívilnanasamningur var kynntur ríkisstjórninni í vor en engin ákvörðun var tekin. Aðkoma ríkisstjórnarinnar að málinu hefur í raun verið mjög lítil.

Nefnd á grundvelli laga um ívilnun vegna nýfjárfestinga mælti í vor með því að veita Huang Nubo ívilnun, meðal annars skattundanþágu, vegna uppbyggingar á Grímsstöðum á Fjöllum. Umsókn um ívilnun hefur þó ekki verið samþykkt af iðnaðarráðuneytinu.

Áform eru um að Nubo leigi jörðina af félagi í eigu sex sveitarfélaga á Norðausturlandi.

Hugmyndin með ívilnunarsamningunum er að hver og einn fjárfestingarsamningur fari ekki fyrir ríkisstjórn og Alþingi. Ívilnanasamningurinn við Nubo var kynntur fyrir ríkisstjórninni í vor, en engin ákvörðun var tekin. Iðnaðarráðherra hefur enga ákvörðun tekið í málinu, enda liggja ekki allir samningar fyrir. Þá hafa landaskipti ekki verið kláruð á jörðinni.

Það var svo hinn 12. júní sl. sem efnahags- og viðskiptaráðherra kynnti fyrir ríkisstjórn að Nubo yrði heimilað að stofna íslenskt einkahlutafélag, en það er forsenda þess að fjárfestingarsamningur á grundvelli laga um ívilnun vegna nýfjárfestinga nái fram að ganga. Ríkisstjórnin þurfti í raun ekki að samþykkja stofnun félagsins, heldur var minnisblað um málið kynnt ríkisstjórninni í upplýsingaskyni. Engin ákvörðun um ívilnun var tekin á þessum fundi.

Einu afskipti ríkisstjórnarinnar af málinu eru í raun þessi, samkvæmt heimildum fréttastofunnar og eru þau þar af leiðandi afar takmörkuð.

Lilja Mósesdóttir, alþingismaður, kallar eftir því á Facebook vefsíðu sinni að þjóðin fái strax allar upplýsingar úr fundargerðum ríkisstjórnarinnar þegar ákveðið var að heimila Nubo að stofna félag hér á landi og jafnframt bókun Ögmundar Jónassonar, innanríkisráðherra, sem gerði athugasemd við það á umræddum ríkisstjórnarfundi.