Brenndu jólasteikinni í hvelli

Landsmenn fjölmenntu í líkamsræktarstöðvar og út að hlaupa í dag til að brenna jólasteikinni. Margir ætluðu hins vegar að halda átinu áfram í kvöld og voru því að vinna sér í haginn.

Trimmklúbbur Seltjarnarness mætti snemma í Seltjarnarneskirkju í morgun og eftir stutta bænastund og samsöng fór fram hið árlega kirkjuhlaup þar sem hópurinn hleypur um fjórtán kílómetra leið framhjá fjölmörgum kirkjum borgarinnar. Mikill fjöldi fólks var mættur í hlaupagallanum og greinilega enginn þungur á fæti þrátt fyrir hangikjötsát.

Þá var um fimmtíu manna hópur hjá Crossfit Kötlu mættur fyrir hádegi á æfingu til að brenna Jólasteikinni eins og æfing dagsins var kölluð.

Í myndbandinu hér að ofan má sjá fólk púla allhressilega og taka á ýmsum lóðum og járnstöngum til að losa sig örugglega við allar umfram kaloríur sem jólaátið felur í sér.

„Hér er best að vera. Þetta er svo gaman, best að vera. Maður fær bara orku," sagði Erla Signý Þormar.

Og kannski inneign fyrir meira áti í kvöld?

„Já, konfektið og allt bíður eftir heima," svaraði hún.

„Ég er að byrja aftur eftir langan tíma í pásu, það er erfitt núna," sagði Guðni Þorsteinn Guðjónsson.

Og þú valdir annan í jólum til að byrja aftur?

„Ef það er einhverntíma tími til að byrja aftur þá er það núna," svaraði hann.

Eftir að hafa raðað í sig kræsingum undanfarna daga friðuðu margir samviskuna í dag með því að skella sér í ræktina, þeirra á meðal Egill Helgason, sjónvarpsmaður.

„Ég er að leggja inn fyrir kalkúninum sem ætla að borða í kvöld og rjúpunum sem ætla að borða á morgun. Þetta er skelfilegt, maður rétt nær að balansera og veitir ekki af," sagði Egill.

Á næstu maskínu í Worldclass hamaðist Jói Fel, sjónvarpskokkur.

„Málið er að ég er svo duglegur að æfa þannig að ég borða bara ennþá meira og ég er búinn að borða svo svakalega mikið að ég þarf að taka extra æfingu. Þó það sé annar í jólum þá er rúmlega 2 klukkutíma æfing framundan. Ég er búinn að borða sko hamborgarhrygg og hangikjöt. Þannig það er búið að vera mikið af salti. Svo það eru rjúpurnar í kvöld," sagði hann.