Pacquiao vill spila með Boston Celtics

Hnefaleikakappinn Manny Pacquiao var í skemmtilegu viðtali á dögunum þar sem hann svaraði mörgum óhefðbundnum spurningum. Þar kom margt skemmtilegt í ljós.

Pacquiao er mikill körfuboltaáhugamaður og Steve Nash, leikmaður Lakers, er hans uppáhaldskörfuboltamaður. Að eigin sögn er Pacquiao góður í körfubolta og draumur hans er að hjálpa Boston Celtics að vinna NBA-deildina.

Pacquiao segir að ánægjulegasta stundin á ferlinum hafi verið þegar hann vann sinn fyrsta bardaga. Kaupið var ekki hátt en hann fékk tvo dollara fyrir sigurinn. Hann segist hafa vitað þá að hann þyrfti aldrei að hafa áhyggjur af peningum.

Hnefaleikakappinn er líka mikill tónlistaráhugamaður. Þau þrjú lög sem hann hefur spilað mest á Ipoddinum sínum eru Ordinary Song með Marc Velasco, Sometimes when we touch með Dan Hill og Imagine með John Lennon.

Þegar Pacquiao bregður undir sig betri fætinum og tekur lagið í karaoke þá syngur hann La Bamba.