Mikil leit gerð að sjómanninum sem féll fyrir borð

Tvö stór skip hófu fyrir hádegi leit að sjómanninum, sem féll fyrir borð af togaranum Múlabergi norður af landinu í gærdag, eftir víðtæka árangurslausa leit í gærkvöldi og fram á nótt.

Hann féll fyrir borð einhverntímann eftir að skipið lét úr höfn í gærdag. Það uppgötvaðist hinsvegar ekki fyrr en um kvöldmatarleitið.

Björgunarskip Landsbjargar á Siglufirði var þegar sent til leitar, nærstödd skip og bátar beðin að taka þátt í leitinni og þyrla Gæslunnar var send á vettvang. Leitin bar engan árangur, enda leitarsvæðið mjög stórt. Þyrlunni var snúið til Reykjavíkur í nótt og sömuleiðis björgunarskipinu.

Togarinn kom til heimahafnar um miðnætti, þar sem skýrsla var tekin af áhöfninni. Sérfræðingar Gæslunnar og fleiri hafa nú reiknað út strauma sjólag og vinda á slóð togarans, og afmarkað leitarsvæði, en þar fer að dimma aftur upp úr klukkkan þrjú í dag. Rannsókn lögreglu hefur ekki enn varpað ljósi á hvernig þetta gerðist.