Harmageddon fer í loftið með nýjum stjórnendum

„Þetta er gríðarlega stórt skarð til þess að fylla upp í, enda eru þeir talsmenn heillar kynslóðar," segir Atli Fannar Bjarkason, framkvæmdastjóri Bjartrar framtíðar sem, ásamt Hauki Viðari Alfreðssyni, munu taka sæti umsjónarmanna útvarpsþáttarins Harmageddon á X-977 í dag.

Eins og kunnugt er þá ákváðu þeir Máni Pétursson og Frosti Logason að fara í ótímabundið leyfi eftir að þeir tóku gagnrýnislaust viðtal sem braut gegn siðareglum útvarpsstöðvarinnar um að halda á lofti femíniskum viðhorfum.

Í kjölfarið kvartaði Hildur Lilliendahl til 365 miðla og krafðist þess að félagarnir færu eftir eigin siðareglum. Þeir tóku undir sjónarmið Hildar, en þeir sitja sjálfir í stjórn útvarpsstöðvarinnar, og viðurkenndu að þeir hefðu sýnt af sér dómgreindarbrest með viðtalinu.

Það var því úr vöndu að ráða við að finna eftirmenn þeirra félaga, en niðurstaðan var sú að fá þá Atla Fannar og Hauk Viðar til þess að fylla í skarðið. Þeir tveir hafa verið með útvarpsþáttinn Laugardagskaffið á sömu útvarpsstöð síðustu ár.

Atli Fannar segir þá félaga áður leyst Frosta og Mána af, en það sé orðið frekar langt síðan. „Og maður finnur auðvitað að það eru mun fleiri að hlusta á virkum dögum heldur en á laugardögum, við erum því dálítið að stíga á stóra sviðið í dag," bætir Atli við örlítið taugastrekktur yfir verkefni dagsins.

Spurður hvort efnistök muni breytast, svarar Atli að slíkt sé auðvitað óhjákvæmilegt. „Við erum náttúrulega aðrar manneskjur og þátturinn verður jafn ólíkur og við erum ólíkir Frosta og Mána," segir Atli sem býst þó ekki við mjög dramatískum breytingum.

„Það eina sem ég veit er að þessir þættir eru gríðarlega vinsælir, og við munum nálgast verkefnið af auðmýkt," segir Atli að lokum. Harmageddon hefst klukkan þrjú í dag.