New York maraþoninu aflýst - Fimmtíu Íslendingar komnir út

New York maraþoninu sem fram átti að fara á sunnudaginn hefur verið aflýst vegna fellibyljarins Sandy. Yfir 50 Íslendingar höfðu ætlað að taka þátt í hlaupinu og fengu ekki fréttirnar fyrr en þeir voru komnir til Bandaríkjanna.

Fréttastofa hitti á Matthildi Hermannsdóttur, fararstjóra íslenska hlaupahópsins, stuttu eftir að hún lenti á JF Kennedy flugvellinum í kvöld og frétti að hlaupinu hefði verið aflýst.

„Hér er náttúrlega bara fullt af Íslendingum sem eru búnir að æfa sig í marga mánuði og búnir að kosta miklu til til að koma hingað," segir Matthildur. „Það eru allir mjög leiðir yfir þessu."

Yfirvöld höfðu fyrr í vikunni gefið út að hlaupið yrði haldið þrátt fyrir fellibylinn, þrátt fyrir rafmagnsleysi og önnur vandamál. Í dag var hins vegar ákveðið að aflýsa hlaupinu því borgaryfirvöld vildu ekki að sorgarský héngu yfir hlaupinu og þátttakendum, miðað við upplýsingar á fréttavef CNN.

Það var mikið áfall fyrir íslenska hlaupahópinn - og hlaupahópa frá öðrum þjóðum væntanlega líka - að frétta af aflýsingunni þegar hópurinn var kominn út eftir margra mánaða stífan undirbúning. Það er auk þess dýrt sport að taka þátt í New York maraþoninu, sem er eitt dýrasta hlaup heimsins.

„Það er svo erfitt að þeir tóku þessa ákvörðun ekki fyrr. Þeir höfðu möguleika til þess," segir Matthildur.