Kosning hafin í Bandaríkjunum.

Búist er við því að 120 milljónir Bandaríkjamanna gangi að kjörborðinu í dag. Þar taka þeir afstöðu til þess hvort þeir vilji hafa Barack Obama, núverandi forseta Bandaríkjanna, í forystu næstu fjögur árin eða fá Mitt Romney í staðinn. Skoðanakannanir sýna að staðan er jöfn. Fyrstu kjörstaðir opnuðu á austurhluta Bandaríkjanna og í miðvesturríkjunum um klukkan ellefu.

Málefnin sem deilt er um eru af margvíslegum toga. Deilt er um niðurskurð á fjárlögum, skattamál, heilbrigðisþjónustu og utanríkismál. Af utanríkismálum eru samskiptin við Kína og viðbrögð við kjarnorkuáætlunum Írans mikilvægust.

Eins og fram hefur komið er spennan mest í Ohio, en Barack Obama hefur mælst með nokkra yfirburði í einstaka lykilríkjum. Allt kemur þó í ljós þegar talið verður upp úr kjörkössunum.

Nái Mitt Romney kjöri verður hann fyrsti mormóninn til að gegna embætti forseta Bandaríkjanna.