Áhrifamestu konur á Íslandi

Tímaritið Nýtt líf hefur valið konu ársins síðastliðin 20 ár. Í ár var brugðið út af vananum og valdi ritstjórn blaðsins að þessu sinni áhrifamestu konurnar árið 2012. Þær eru kynntar í nýútkomnu tölublaði.

"Konurnar eru úr ólíkum geirum á mismunandi aldri og hafa skarað fram úr á sínu sviði, rutt brautina eða unnið eftirtektarverða sigra á árinu. Þær eru öðrum hvatning og fyrirmyndir,“ segir í tilkynningu frá Nýju lífi.

Í hópi þeirra áhrifakvenna eru Nanna Bryndís Hilmarsdóttir úr Of Monsters and Men fyrir ævintýralega gott gengi í tónlistarbransanum. Einnig Agnes Sigurðardóttir, sem varð fyrst kvenna kjörin biskup á árinu. Þóra Arnórsdóttir forsetaframbjóðandi fyrir að minna á að barnauppeldi er ekki ástæða til að útiloka konur frá valdastöðum. Helga Margrét Reykdal, framkvæmdastjóri True North, fyrir að laða kvikmyndaframleiðendur frá Hollywood til landsins, halda utan um framleiðslu fjögurra kostnaðarsamra kvikmynda og stuðla að verðmætri landkynningu. Annie Mist Þórisdóttir, tvöfaldur heimsmeistari í Crossfit og Herdís Þorvaldsdóttir fyrir þrautseigju í baráttunni fyrir náttúruvernd.

Meðal annarra kvenna sem urðu fyrir valinu eru Jóhanna Sigurðardóttir forsætisráðherra Íslands, Hildur Lilliendahl femínisti, Oddný Harðardóttir fyrsti kvenkyns fjármálaráðherrann, Auður Ava Ólafsdóttir metsöluhöfundur, Solla Eiríks frumkvöðull í heilsufæði og Sigrún Ragna Ólafsdóttir forstjóri VÍS. Þá er einnig fjallað um fleiri áhrifakonur í blaðinu.