Íslensk ungmenni hafa jákvæðari hugmyndir um líkama sinn

Íslensk ungmenni hafa mun jákvæðari hugmyndir um líkama sinn en önnur ungmenni á Norðurlöndunum. Hugmyndir þeirra um sjálfan sig hafa batnað á síðustu sex árum eftir því sem fram kemur í nýrri rannsókn.

Íslensk ungmenni hafa mun jákvæðari hugmyndir um líkama sinn en jafnaldrar þeirra á Norðurlöndunum og hugmyndir þeirra um sig hafa orðið jákvæðari undanfarin ár.

Í niðurstöðum lokarannsóknar Önnu Lilju Sigurvinsdóttur kemur meðal annars fram að óánægja með eigin líkama eykst með hækkandi aldri, sérstaklega hjá stúlkum, og eftir því sem börnin eru þyngri þeim mun óánægðari eru þau og þeim mun meiri líkur eru á að þau fari í megrun.

En einnig komu fram jákvæðar niðurstöður:

„Helstu niðurstöður sýna að líkamsímynd ungmenna batnar á tímabilinu 2006 til 2010 þannig krakkarnir eru að verða sáttari við sig," segir Anna Lilja.

Sem dæmi má nefna að nær 20 prósent ellefu ára stúlka óánægðar með sig árið 2006. Fjórum árum síðar eða árið 2010 hafði ástandið batnað talsvert og voru tæplega 15 prósent stúlkna óánægðar með sig.

Þá bar Anna Lilja tölurnar saman við það sem gerist annarsstaðar á Norðurlöndum. „Þá stendur Ísland mjög vel og í þeim samanburði voru íslenskir krakkar með bestu líkamsmyndina af jafnöldrum sínum á Norðurlöndum. Krakkarnir eru þannig sátt við sjálfan sig og eru ekki að nota megrun til að stjórna eigin þyngd," segir Anna Lilja sem segir gleðilegt að umræða um offitu ungmenna sé ekki að hafa áhrif á þau enda mælist langflest þeirra í kjörþyngd.

„Ég hef aðallega horft til Norðurlandanna og mér virðist sem að í Noregi hafi ungmenni svolítið neikvæða líkamsmynd en Ísland stendur mjög vel í alþjóðlegum samanburði," segir Anna Lilja.