Fyrsta stórmótið þar sem íslensku strákarnir vinna verðandi meistara

Íslenska handboltalandsliðið afrekaði það á Ólympíuleikum í London sem íslensku strákanir hafa aldrei náð áður á stórmóti en það er að vinna verðandi meistara. Þetta varð ljóst um leið og Frakkar og Svíar tryggðu sér sæti í úrslitaleiknum í gær.

Íslenska handboltalandsliðið vann leiki sína gegn Frakklandi og Svíþjóð í riðlakeppninni, fyrst 33-32 sigur á Svíum í þriðja leik sínum á leikunum og svo 30-29 sigur á Frökkum í næsta leik á eftir. Eina tap Frakka á leikunum kom á móti Íslandi en Svíar töpuðu bæði fyrir Íslandi og Frakklandi í riðlinum.

Þetta er tólfta stórmótið sem íslenska landsliðið mætir verðandi meisturum en þar er verið að tala um Ólympíuleika, Heimsmeistarakeppni eða Evróumót.

Bestum árangri gegn verðandi meisturum höfðu íslensku strákarnir náð á Ólympíuleikunum í Los Angeles árið 1984. Íslenska liðið mætti þá Júgóslavíu í fyrsta leik mótsins og gerði 22-22 jafntefli. Júgóslavar voru reyndar heppnir að sleppa með jafnteflið því íslenska liðið var fjórum mörkum yfir, 22-18, þegar fimm mínútur voru til leikslok.

Þetta var jafnframt í fyrsta sinn sem íslenska landsliðið mætti verðandi meisturum á stórmóti en síðan þá höfðu íslensku strákarnir tapað tíu leikjum í röð á móti verðandi meisturum á HM, ÓL eða EM.

Leikir Íslands á móti verðandi meisturum á stórmótum:

ÓL 1984 - 22-22 jafntefli við Júgóslavíu

ÓL 1988 - 19-32 tap fyrir Sovétríkjunum

ÓL 1992 - 19-23 tap fyrir Samveldinu (undanúrslit)

Hm 1993 - 19-27 tap fyrir Rússlandi

EM 2000 - 23-31 tap fyrir Svíþjóð

EM 2002 - 22-33 tap fyrir Svíþjóð (undanúrslit)

ÓL 2004 - 30-34 tap fyrir Króatíu

HM 2007 - 28-33 tap fyrir Þýskalandi

Ól 2008 - 23-28 tap fyrir Frakklandi (úrslitaleikur)

EM 2010 - 29-36 tap fyrir Frakklandi (undanúrslit)

HM 2011 - 28-34 tap fyrir Frakklandi

ÓL 2012 - 33-32 sigur á Svíþjóð eða 30-29 sigur á Frakklandi