Kona barin ítrekað með áhaldi í háskólanum á Hólum

Nemandi í háskólanum á Hólum var fluttur með sjúkrabíl á sjúkrahús í Reykjavík á sunnudagsmorgun eftir alvarlega líkamsárás á nemendagörðum skólans. Nemandinn, sem er kona á þrítugsaldri, var barin ítrekað í andlitið með áhaldi en árásarmaðurinn hefur játað á sig verknaðinn.

Það var á aðfaranótt sunnudags sem lögreglan á Sauðárkróki fékk tilkynningu um alvarlega líkamsárás á Hólum í Hjaltadal. Þegar lögreglan kom á staðinn var strax ljóst hver það var sem veitti konunni áverkana og var karlmaður á þrítugsaldri handtekinn og vistaður í fangageymslu. Rannsóknarlögreglumenn frá Akureyri komu á vettvang strax um morguninn, rannsökuðu vettvang og tóku skýrslu af manninum. Maðurinn játaði brot sitt en á vettvangi fannst áhald sem hann notaði til að veita konunni áverkana. Samkvæmt upplýsingum frá lögreglu er um hurðarhún að ræða. Þá fundust einnig lítilræði af fíkniefnum á vettvangi.

Konan hlaut mikla áverka, skurði í andliti og þá brotnuðu í henni margar tennur. Varðstjóri segir að líðan hennar sé eftir atvikum. Tekin var ákvörðun um að fara ekki fram á gæsluvarðhald yfir manninum, þar sem hann var gestkomandi í skólanum og býr ekki á Hólum. Þá segir varðstjóri hjá lögreglu að hann hafi ekki sýnt neina tilburði til að koma undan sönnunargögnum og hann hafi játað að hafa ráðist á konuna.