Kosið um að fjölga um eina deild og breyta leikbönnum á ársþingi KSÍ

Breiðholtsfélögin Leiknir og KB annarsvegar og KF úr Fjallabyggð hinsvegar eiga athyglisverðustu tillögurnar fyrir 66. ársþing KSÍ sem verður haldið á Hilton Nordica Hótel 11. febrúar næstkomandi. Hér er um að ræða tillaga um að fjölga um eina deild og leyfa fleiri gul spjöld áður en menn fara í leikbann. Grindvíkingar vilja líka að ungt knattspyrnufólk verði ári lengur í yngri flokkum og að aldursskipting verði nær því sem er í gangi hjá landsliðunum.

Leiknir og KB leggja til að stofnað verði fimmta deild eða E-deild. Úrvalsdeild, B-deild, C-deild verði allar skipaðar tólf liðum, tíu lið verði í D-deild en félög sem eiga ekki lið í efstu fjórum deildunum verði síðan í E-deildinni. Aðalástæðan er að getumunurinn er orðinn of mikill í D-deildinni og að með þessu ætti breiddin að aukast.

KF leggur til að leikmenn megi fá fjögur gul spjöld og fari ekki í leikbann fyrr en eftir fimmta gula spjaldið. Nú fara menn í bann eftir fjórða gula spjaldið. KF vill ennfremur að leikbannið færist upp alla leið þannig að næsta bann komi eftir sjö spjöld en ekki sex spjöld eins og er raunin í dag. Leikmenn fái því bönn eftir fimmta, sjöunda, níunda og ellefta spjald í staðinn fyrir fjórða, sjötta, áttunda og tíunda.

Fullt að félögum leggja líka til að spjöld á Íslandsmóti og í bikarkeppni verði aðskilin og leikmenn taki út leikbönn innan hvors móts fyrir sig.

Grindvíkingar leggja til að aldursskiptingu í yngri flokkum verði breytt og að ungt knattspyrnufólk verði ári lengur í yngri flokkum til þess að vinna gegn brottfalli. Leikmenn fari þannig upp í 1. flokk úr 2. flokk og verði þar árið sem þeir verða 21 árs. Leikmenn verði síðan í 2. flokk frá 18 til 20 ára í stað 17 til 19 ára eins og er í gildi í dag. Leikmenn verði síðan í 3. flokki 16 og 17 ára (áður 15 og 16 ára), í 4. flokki 14 og 15 ára (áður 13 og 14 ára), í 5. flokki 12 og 13 ára (áður 11 og 12 ára) og í 6. flokki fram að því að þeir eru 11 ára (10 ára áður).

Það má sjá yfirlit yfir allar tillögur á ársþingi KSÍ 2012 með því að smella hér.