Mörður hvetur Steinþór til að segja upp

Mörður Árnason alþingismaður hvetur Steinþór Pálsson bankastjóra Landsbankans til að segja upp störfum. Tilefnið er umsögn bankaráðs Landsbankans við frumvarpi um kjararáð þar sem lagt er til að bankaráðið úrskurði um laun Landsbankastjóra en ekki kjararáð. Þetta er í samræmi við skoðun Steinþórs sem hann lét ljósa í Klinkinu á Vísi á dögunum en þar sagði Steinþór að laun sín væru ekki samkeppnishæf. Laun Steinþórs eru um þriðjungur af launum bankastjóra hinna bankanna, Arion og Íslandsbanka.

„Einn helsti vandinn í atvinnu- og efnahagsmálum þjóðarinnar er sá að mati bankastjóra og bankaráðs Landsbankans að þar fær yfirmaðurinn ekki nógu há laun. Hann er ekki með nema milljón plús á mánuði - ekki einusinni jafnt og forsætisráðherrann," skrifar Mörður á blogg sitt.

„Margir væru til í að skipta á áhyggjumálum við Steinþór Pálsson - en við verðum auðvitað að skilja hvað þetta hlýtur að vera erfitt fyrir menn einsog hann: Að vera alltaf litli kallinn þegar bankastjórarnir hittast, að tala við erlenda kollega með tíu sinnum hærri laun, að geta bara keyrt slyddujeppa þegar hinir strákarnir í klúbbnum mæta í tennistímana á almennilegum fjallatrukkum," bætir Mörður við.

Hann segir þó að Steinþór eigi augljósan kost í stöðunni: „Að segja upp hjá Landsbankanum og ráða sig á almennilegum launum hjá einkabransanum - til dæmis einhverjum af fjölmörgum gæðafyrirtækjum í eigu bankakerfisins."

Mörður bætir því við að á meðan Landsbankinn sé í eigu ríkisins eigi að reka hann á öðrum forsendum en einkabanka. „Meðal þeirra forsendna er sú að launamálum sé hagað með siðrænum hætti og í samræmi við launastefnu innan opinbera geirans."

„Kannski merkir það að allra mestu snillingarnir fara annað að leita sér að vinnu. En opinber fyrirtæki þurfa þá að hafa aðra kosti - og það hélt ég Landsbankinn í núverandi stöðu hefði svo sannarlega í umróti breytinga og umsköpun fjármálakerfisins og atvinnulífs.“