Fjölskylduævintýri

Angelina Jolie fer með hlutverk illu drottningarinnar Maleficent í samnefndri ævintýramynd sem nú er í tökum. Þrjú barna hennar fara einnig með hlutverk í kvikmyndinni.

Vefsíðan Huffingtonpost.com segir dóttur Jolie og Brad Pitt, Vivienne, fara með hlutverk prinsessunnar Áróru á móti Elle Fanning. Sonurinn Pax og dóttirin Zahara fara með önnur smærri hlutverk. Fjórða barnið átti einnig að leika í myndinni en hætti við.

"Shiloh átti einnig að leika í myndinni en henni leiddist það og vildi ekki taka þátt þegar á hólminn var komið," var haft eftir heimildarmanni.

Kvikmyndin er framleidd af Walt Disney Productions og er ævintýrið um Þyrnirós sagt frá sjónarhorni illu drottningarinnar Maleficent. Tökur á myndinni hófust í London í sumar og áætlað er að myndin verði frumsýnd þann 14. mars árið 2014.