Ekki lagaheimild til að leigja makrílkvóta

Bjarni Harðarson upplýsingafulltrúi sjávarútvegs- og landbúnaðarráðuneytisins telur grein Magnúsar Orra Schram frá því í gær ómaklega. Í greininni sakar Magnús stjórnvöld um að hafa misst af tekjum upp á 6 milljarða þegar þeir úthlutuðu makrílkvóta án þess að rukka gjald fyrir.

„Það er alveg ljóst að ráðherra hefur ekki lagaheimild til að innheimta sérstakt gjald eins og Magnús Orri Schram leggur til," segir Bjarni og bætir við að síðan Íslendingar byrjuðu stórfellda makrílveiði hafi ekki komið fram sérstakar tillögur á Alþingi um að farið væri í slíka gjaldtöku fyrir makríl. Nú sé enda í gangi heildarendurskoðun fiskveiðistjórnunarkerfisins.

Í grein sinni vísaði Magnús til þess að Færeyingar hefðu hagnast umtalsvert af því að leigja makrílkvóta til útgerðaraðila. Bjarni telur tilvísun til þess hvernig Færeyingar hafa hagað sínum málum er ekki raunhæfa í þessu efni.

„Þar í landi hafa menn alls ekki náð sambærilegum árangri í veiðum og nýtingu makríls. Hér á landi fer makríllinn nú nær allur til manneldis sem skiptir miklu fyrir þjóðarbúið og samningsstöðu Íslands á alþjóðavettvangi."