Endurvekur gömlu bókauppboðin

„Ég er aðeins að reyna að endurlífga gömlu bókauppboðin sem voru í den en svona með nútímavæddu sniði," segir Ari Gísli Bragason, fornbókasali og framkvæmdastjóri fornbókaverslunarinnar Bókin ehf. Hann hefur undanfarna daga verið með uppboð á fornbókum á vefnum uppbod.is, en því líkur í dag. 

„Þetta er netuppboð. Þarna eru 113 bækur á uppboði, meðal annars bækur eftir verðlaunahöfundinn Gyrði Elíiasson," bætir Ari Gísli við. Hann ætlar líka að selja frumútgáfu Jóhannesar Birkilands á verkinu „Harmsaga ævi minnir" og fleira.

Fornbókaverslunin Bókin hf var stofnuð í Reykjavík árið 1964 og hefur því verið starfandi í hartnær fimmtíu ár. Þar hafa feðgarnir Bragi Kristjónsson, Ari Gísli Bragason starfað að undanförnu við að miðla bókum og meta bækur fyrir einstaklinga, ásamt Eiríki Ágústi Guðjónssyni.