Á djasshátíð í Düsseldorf

Hljómsveitinni Guitar Islancio hefur verið boðið að spila við opnun hinnar þekktu djass­hátíðar Düsseldorf Jazz Rally í júní.

Sveitin er nýkomin heim úr vel heppnaðri Þýskalandsför þar sem hún spilaði á stórri ferðaráðstefnu í Stuttgart. Í framhaldinu spilaði hún á þekktasta djassklúbbi borgarinnar, Bix Jazzclub, við góðar undirtektir. Stutt er síðan Guitar Islancio sendi frá sér safnplötuna Best of Guitar Islancio með úrvali af því efni sem hefur komið út á undanförnum árum.

Næstu tónleikar sveitarinnar verða í kvöld í Listhúsinu í Hafnarfirði á Safnadeginum.

Hér fyrir ofan má sjá myndband af Guitar Islancio á djasshátíð í Berlín árið 2001.