Leg verða grædd í konur

Allt bendir til að hægt verði að græða leg í konur innan tíðar. Prófessor og yfirlæknir á kvennasviði Landspítalans segir undirbúning að slíkri aðgerð hafinn í Svíþjóð og sennilega verði gerð tilraun til ígræðslu þessu ári. Gæfi það góða raun þyrftu færri konur að leita til staðgöngumæðra.

Reynir Tómas Geirsson, yfirlæknir á kvennadeild og verndari samtaknna Staðganga segir að ef sett yrðu lög um málið sem heimiluðu staðgöngumæðrun yrði að huga að mörgu og tryggja hagsmuni barnsins sem best, tryggja skyldur foreldranna við staðgöngumóðurina og skyldur hennar við þá. Þá yrði að fara yfir, út frá læknislegu sjónarmiði,, hverjir gætu orðið staðgöngumæður og ekki síst hvaða konur gætu óskað eftir staðgöngumóður.

Honum þykja helst þær konur koma til greina sem hafa fæðst án legs, svo eru konur sem hafa misst legið til dæmis vegna krabbameins eða mikilla blæðinga eftir fæðingu. Því næst einstaka aðrar konur sem eru með undirliggjandi sjúkdómsástand en eiga samt góðar lífslíkur gangi þær ekki með barn.

En framfarir í læknavísindum gætu hugsanlega komið til móts við þessar konur innan skamms og dregið úr þörf á staðgöngumæðrum. Það er að segja legígræðsla. Það hafi áður verið reynt en sú tilraun var illa undirbúin og líkami konunnar hafnaði leginu. Nú er hins vegar búið að vinna mikla undirbúningsvinnu í Bandaríkjunum og Svíþjóð og reyna eigi að græða aftur leg í konu, hugsanlega í ár.

Ef vel takist til gætu konur hugsanlega óskað eftir slíkri legígræðslu eftir tvö til fimm ár eða þar til tæknin er búin að sýna sig og sanna og áhættan ekki meiri en við nýrna-, hjarta-, og lungnaígræðslu. „Þá gæti þetta orðið raunhæfur möguleiki fyrir einhverjar af þessum konum," segir Reynir.