Árni kafar ofan í tónlist frá tíunda áratugnum

„Það er ekkert svakalegt úrval af töff tónlist frá þessum tíma,“ segir Árni Sveinsson, kvikmyndagerðamaður og plötusnúður, en segja má að hann sé á kafi í tónlist frá tíunda áratugnum þessa dagana.

Árni sér um að velja viðeigandi tónlist fyrir íslensku kvikmyndina Svartur á leik, en hún gerist á árunum 1998-2000. Árni þarf því að kafa ansi djúpt ofan í plötutöskuna eftir réttu lögunum. „Við erum að reyna að einblína á íslenska tónlist og þá helst svona danstónlist þar sem það er mikið um partísenur í myndinni en það er nú ekkert sérstaklega mikið úrval af íslenskri danstónlist frá þessum tíma,“ segir Árni og bætir við að hann skemmti sér vel við þessa vinnu, en hann var á bak við plötusnúðagræjurnar á Kaffibarnum á þessum árum og segist ekki muna eftir að hafa spilað íslenska tónlist þá. „Það er allt annað í dag og mikil gróska í íslenska tónlistarheiminum sem byrjaði fyrir svona fjórum árum.“

Gus Gus, Stjörnukisi og Ensími eru meðal þeirra hljómsveita sem eiga lög í myndinni en Árni segir að hann sé líka að skoða lög eftir Bubba. Árni byrjaði að vinna að þessu verkefni í byrjun nóvember og hefur því fengið að sjá þónokkrar senur úr myndinni. „Hún lofar mjög góðu og er bæði nöturleg og hrottaleg í senn.“ Frank Hall sér um að semja tónlistina í myndina en Svartur á leik verður frumsýnd í mars á næsta ári. Í gær var fyrsta stiklan úr myndinni frumsýnd á Vísi. - áp