Spike Lee féll fyrir íslenskri hljómsveit

„Þetta er mjög skemmtilegur náungi, engir stælar eða neitt,“ segir Ragnar Ólafsson úr hljómsveitinni Árstíðir.

Ragnar og félagar kynntust bandaríska leikstjóranum Spike Lee þegar þeir voru að spila í spjallþætti á rússnesku sjónvarpsstöðinni TV Rain í síðasta mánuði. Lee var þar í viðtali og höfðu Árstíðir ekki hugmynd um að hann yrði á meðal gesta. „Við fengum sjokk þegar hann labbaði inn,“ segir Ragnar. „Við vissum ekki hver væri með okkur og svo labbaði þessi stuttvaxni leikstjóri inn.“

Þáttastjórnandinn bað Árstíðarmenn um að spyrja Lee nokkurra spurninga. Leikstjórinn sagðist aldrei hafa komið til Íslands en hafði mikinn áhuga á koma hingað. Eftir að upptökum lauk gáfu Ragnar og félagar honum nýjustu plötu sveitarinnar, Svefns og vöku skil. „Hann heyrði okkur spila í hljóðprufunni og sagði að hann væri strax orðinn aðdáandi okkar.“

Lee var staddur í Rússlandi til að kynna væntanlega mynd sína Oldboy en Árstíðir var á tveggja vikna tónleikaferðalagi um landið, sem gekk vonum framar. Daginn eftir sjónvarpsþáttinn sendi Lee Ragnari og félögum skilaboð á Twitter-síðunni þar sem hann þakkaði fyrir síðast: „Þið eruð frábærir. Haldið ótrauðir áfram. Hafði mjög gaman af tónlistinni ykkar. Ást og friður, Spike.“

- fb