Hópur Guðmundar fer ört stækkandi

„Þetta gengur alveg glimrandi vel. Þetta verður úti um allt land, það er þannig áhugi,“ segir Guðmundur Steingrímsson þingmaður um viðræður vegna væntanlegs framboðs nýs flokks í þingkosningunum árið 2013. „Hópurinn er alltaf að stækka.“

Guðmundur hefur, eins og kunnugt er, verið í viðræðum við fólk úr Besta flokknum og L-listanum á Akureyri, ásamt fólki úr öðrum óháðum framboðum á Vestur-, Austur- og Suðurlandi. „Þetta er enn á þreifingastigi og verður að fá að koma í ljós,“ segir hann. „Það er meðal annars fólk úr L-listanum sem hefur talað við okkur og fólk í alls konar óháðum framboðum annars staðar líka. Það er kannski engin tilviljun, við erum að tala um svipaða hluti og óháðir flokkar víðs vegar um landið.“

Geir Kristinn Aðalsteinsson, oddviti L-listans, tekur því fagnandi að verið sé að þreifa fyrir sér með stofnun nýs stjórnmálaflokks. Hann segir L-listann ekki ætla í framboð sem heild en vissulega sé áhugi meðal fólks í flokknum að halda áfram viðræðum.

„L-listinn ætlar ekki að tengjast þessum nýja flokki. En ef einhver innan okkar raða hefur áhuga á að starfa með honum myndi listinn ekki setja sig á móti því,“ segir Geir. Hann segir engan af bæjarfulltrúum listans ætla í framboð.

„Við fögnum því þó að menn séu að gera þetta. Þetta er þarft framtak og það þarf nýja sýn á stjórnmálin,“ segir hann og bætir við að þar sem L-listinn sé með hreinan meirihluta í bæjarstjórn Akureyrar vanti klukkutíma í sólarhringinn frekar en hitt og því sjái hann ekki fram á að menn hafi tíma í frekari stjórnmálastörf.- sv