Uppbyggingu ekki stýrt af skilanefnd

„Það kemur úr hörðustu átt að fá skeyti af þessu tagi frá þeim sem vinna úr búi föllnu bankanna, sérstaklega Landsbankans. Bankarnir sköpuðu okkur mikið fjárhagslegt tjón og við erum að reyna að hífa samfélagið upp úr því og skapa tekjur til að vinna úr áfallinu sem við urðum fyrir við fall bankanna,“ segir Steingrímur J. Sigfússon fjármálaráðherra. Tilefnið er gagnrýni skilanefndar gamla Landsbankans, sem fram kom í Fréttablaðinu á miðvikudag, á nýja bankaskatta og kvótamál.

Skilanefndin taldi áform stjórnvalda geta rýrt virði eignasafns bankans og mögulega þyrfti að láta á áhrifin reyna fyrir dómi. Samkvæmt samningum við kröfuhafa var gefið út skuldabréf sem getur að hámarki orðið 92 milljarðar króna. Náist það eignast kröfuhafarnir það og skila hlut sínum í nýja Landsbankanum til fjármálaráðuneytisins. Bréfið er skilyrt við mat á eignasafni bankans í árslok 2012.

Hann telur ekki tilefni til að hafa áhyggjur, ágætis horfur séu á því að heimtur náist upp í bréfið. Þá verði uppgjöri á milli gamla og nýjna bankans lokið á næsta ári og því lítil ástæða fyrir skilanefnd bankans að hafa áhyggjur af mögulegum framtíðarhorfum varðandi skattlagningu og fiskveiðistjórnun.

„Ef einhverjir ættu að hafa skilning á tjóninu, þeim kostnaði sem af því hlaust og þeirri tekjuöflunarþörf sem það skapaði, ættu það að vera þeir sem véla um bú gömlu föllnu bankanna,“ segir Steingrímur.

Hann segir ekki annað standa til en að skapa fjármálastarfsemi og sjávarútvegi eðlileg skilyrði til að þróast. Ekki þurfi skilanefndina til að segja ríkisstjórninni fyrir verkum í þeim efnum.

„Það er algjörlega á hreinu að það stendur ekki til að fara að stýra enduruppbyggingu samfélagsins á grundvelli skilaboða frá þeim aðilum. Þeir fá sitt uppgjör, sem staðið verður faglega að.“

Steingrímur segir að við uppgjörið verði kröfuhafar í gamla bankann lausir sinna mála og nýi bankinn laus við þá. Engin ástæða sé til að hafa áhyggjur af því. „Ég vil ekki gefa mér neitt fyrirfram um endanlega niðurstöðu í þessu og ætla ekki að blanda mér í uppgjörið. En eins og málin hafa þróast eru ágætis horfur á að það fáist upp í þetta bréf.“

kolbeinn@frettabladid.is