Innlendar níðingssíður sýna íslenskar stúlkur

Samtökunum Barnaheill – Save the Children á Íslandi bárust á síðasta ári ábendingar um íslenskar vefsíður sem vistaðar eru erlendis og hver sem er getur sett inn efni á. Þar var meðal annars að finna kynferðislegt efni, texta og myndir af íslenskum stúlkum undir lögaldri.

Þetta segir Petrína Ásgeirsdóttir framkvæmdastjóri samtakanna. Barnaheill tók í gær, í samstarfi við SAFT (Samfélag, fjölskylda og tækni) og embætti ríkislögreglustjóra, í notkun nýjan ábendingarhnapp um ólöglegt og óviðeigandi efni tengt börnum á netinu. Með því að smella á hnappinn á www.barnaheill.is getur almenningur tilkynnt um slíkt efni.

Nær 4.000 ábendingar um efni þar sem börn eru sýnd á kynferðislegan hátt eða beitt kynferðisofbeldi hafa borist frá því að Barnaheill opnaði ábendingalínu árið 2001. Á síðasta ári bárust samtökunum 30 ábendingar vegna mögulegs efnis þar sem börn eru beitt kynferðislegu ofbeldi eða sýnd á kynferðislegan hátt. Af þessum ábendingum reyndust 37 prósent vera myndir sem innihéldu ofbeldi gegn börnum.

Einnig bárust tíu ábendingar um óviðurkvæmilegt efni á netinu svo sem Facebook-síður, þar sem menn villtu til dæmis á sér heimildir og þóttust vera aðrir en þeir eru. Samtals voru ábendingarnar því 40, töluvert færri en á árunum 2001 til 2008.

Á árinu 2009 bárust samtals 59 ábendingar. Af þeim var rúmur helmingur, 58 prósent, efni þar sem börn voru beitt kynferðislegu ofbeldi eða sýnd á kynferðislegan hátt.

Allar ábendingar um ólöglegt efni fara til embættis ríkislögreglustjóra, þar sem þær eru rannsakaðar og gripið til viðeigandi aðgerða, að sögn Petrínu. Þá fara ábendingar um óviðeigandi efni, svo sem meiðyrði, hótanir eða haturstal um ákveðna hópa, til netþjónustuaðila til skoðunar. Petrína undirstrikar að markmiðið sé ekki einungis að ná til þeirra sem haldi úti vefsíðum með ólöglegu efni. Forvarnirnar sem í aðgerðunum felist séu ekki síður mikilvægar.jss@frettabladid.is