Yesmine syngur frumsamið lag á hindí

Yesmine Olsson, dansari og ástríðukokkur, hefur í nægu að snúast þessa dagana. Ásamt því að setja upp Bollywood sýningu í Hörpunni í nóvember vinnur hún að nýjum matreiðsluþætti fyrir RÚV og skipuleggur viðburð í tengslum við Riff kvikmyndahátíðina.

Yesmine samdi lag sérstaklega fyrir sýninguna sem hún mun setja upp í Hörpunni og er textinn bæði á hindí og á ensku en lagið sjálft er í anda Bollywood söngvanna. „Mig langaði að prófa að semja lag sjálf og fékk vin minn, tónlistarmanninn Stefán Örn Gunnlaugsson, til að aðstoða mig. Við lögðumst í smá rannsóknarvinnu áður og stúderuðum tónlistarstefnuna áður en við hófumst handa við að semja. Ég samdi svo textann sjálf með aðstoð Google en ég veit ekki hvort textinn sé skiljanlegur á hindí,“ segir Yesmine og hlær.

Sýningin í Hörpunni nefnist Hollywood meets Bollywood og blandar saman hefðbundnum Bollywood dans og svo aðeins nútímalegri dansi í anda bandarískra poppstjarna. Sýningin er með sama sniði og sú sem fram fór í Turninum í fyrra, nema stærri og stórkostlegri. Eiginmaður Yseminar, tónlistarmaðurinn Arngrímur Fannar Haraldsson, starfar sem verkefnastjóri tónlistarviðburða í Hörpunni.

Innt eftir því hvort þau hjónin verði þá að vinna saman svarar Yesmine neitandi. „Við förum kannski í hádegismat saman, en við munum ekki vinna hlið við hlið,“ segir hún að lokum glaðlega.

Hægt verður að nálgast miða á viðburðinn í Hörpu og á Midi.is frá og með deginum í dag. -sm