Ferðamenn í hættu á götóttum Geysisvegi

Framkvæmdir við fjölfarna ferðamannaleið, um Laugardal milli Laugarvatns og Geysis, hafa staðið yfir í allt sumar. Það kemur illa niður á ferðaþjónustunni. Verkið er komið fram úr áætlun.

„Þú getur nú rétt ímyndað þér það,“ segir Þórður Tyrfingsson, deildarstjóri hjá Vegagerðinni, um hvort tafirnar hafi ekki valdið vegfarendum óþægindum. Hann segir þær standa upp á verktakann sem eigi að hafa lokið verkinu. Hann segir Vegagerðina búa yfir úrræðum gagnvart verktökum þegar svona staða komi upp en vill ekki fara nánar út í hver þau eru.

Verkið var boðið út í fyrrahaust og átti framkvæmdum að vera lokið 15. júní. Þórður vonast til að fljótlega verði lögð klæðning á veginn.

„Við keyrum þarna oft á dag og það er hræðilegt að horfa upp á þetta,“ segir Þórir Garðarsson, framkvæmdastjóri Iceland Excursion. „Það er til háborinnar skammar að þetta skuli ekki vera klárað.“

Þórir segir veginn mjög grófan, allur ofaníburður sé fokinn í burtu. Þá hafi vegurinn ekkert verið vökvaður og því sé mikið ryk á honum. Hann segir veginn fara mjög illa með bílana. Margir séu langþreyttir á framkvæmdunum og virði hraðatakmörk lítt. Framúrakstur skapi grjótkast með tilheyrandi skemmdum.

„Þetta er beinlínis hættulegur vegur.“

Ferðamenn kippa sér þó lítið upp við aðstæðurnar að sögn Þóris. „Það kemur mér í raun á óvart hve lítið þeir eru hissa. Það er kannski vegna þess að þeir telja okkur vanþróaðri en við erum, en hvort það eru meðmæli með okkur skal ósagt látið.“

Framkvæmdir standa einnig yfir við Biskupstungnabraut, en þar er einnig verið að breikka veginn. Leiðirnar að Geysi eru því báðar framkvæmdasvæði. Þórir segir engin vandkvæði við þær framkvæmdir, þær gangi greitt og þar sé passað upp á að vökva veginn. „Bílstjórar eru almennt þolinmóðir gagnvart Vegagerðinni og verktökum sem bæta vegina.“ Þolinmæðin sé hins vegar á þrotum hvað varðar Laugardalsleiðina.

Valtýr Valtýsson, sveitarstjóri Bláskógabyggðar, segir ljóst að vegurinn sé ekki skemmtilegur. Þetta sé fjölfarin leið fyrir ferðaþjónustuna og mikið hark fyrir þá sem séu með rútur. „Við erum að vonast til að þessu fari að ljúka.“

Ekki náðist í forsvarsmenn verktakans, Vélgröfunnar ehf., við vinnslu fréttarinnar.

kolbeinn@frettabladid.is