Krefjast skaðabóta vegna brota ríkisins

Erlingur Sveinn Haraldsson og Örn Snævar Sveinsson, sem hafa upp á vasann álit frá Mannréttindanefnd Sameinuðu þjóðanna um að íslenska ríkið hafi brotið á þeim með því að dæma þá fyrir að veiða án kvóta, sendu Ögmundi Jónassyni innanríkisráðherra bréf í þessum mánuði þar sem þess er krafist að ríkið bregðist við þessu áliti. Í því felst að ríkið viðurkenni að það sé skaðabótaskylt gagnvart tvímenningunum og að núverandi fiskveiðikerfi verði lagt af eins og það er.

„Ég hef formlega gert grein fyrir þeirra máli í ríkisstjórn en er að öðru leyti með málið til skoðunar í ráðuneytinu," segir Ögmundur. Hann segist einnig hafa rætt við tvímenningana og Lúðvík Kaaber, lögmann þeirra. „Ég mun á einhvern hátt bregðast við þeirra erindi," bætir hann við en segir ómögulegt að segja til um það nú hvenær eða með hvaða hætti það verði. Hann segir þó að óskin um breytingar á fiskveiðistjórnunarkerfinu samræmist stefnu ríkisstjórnarinnar um að tryggja jafnræði varðandi atvinnuréttindi.

Örn Snævar sagðist hafa verið bjartsýnn um að ríkið brygðist við þegar Mannréttindanefnd Sameinuðu þjóðanna hafði gefið út álit sitt. Þegar í ljós kom að svo var ekki stefndu þeir félagar ríkinu fyrir héraðsdóm og síðan til Hæstaréttar en á báðum stigum var málinu vísað frá. Örn Snævar segir þá afgreiðslu hafa verið þunnan þrettánda. „Þeirri spurningu, hvort íslenska ríkið ætti ekki að fara eftir alþjóðlegum sáttmálum sem það hefði skrifað undir, svaraði Hæstiréttur á þann veg að það væri lögfræðilegt atriði sem ekki yrði tekið til umfjöllunar að þessu sinni," segir hann. „Ef Hæstiréttur vill ekki skera úr um lögfræðileg atriði hver á þá að gera það?" spyr hann á móti. Hann segir enn fremur að þeir tvímenningar séu staðráðnir í því að láta málið ekki daga uppi.

Eiríkur Bergmann Einarsson stjórnmálafræðingur segir hins vegar að staða þeirra sé afar erfið ef þeir una ekki þeirri niðurstöðu sem ríkið kemst að. „Ef ríkið hefur einbeittan brotavilja þá getum við borgararnir lítið gert," segir hann. „Það er ekkert yfirvald fyrir ofan hið fullvalda ríki sem getur þvingað það til að fara að lögum."

jse@frettabladid.is