Papandreou leitar á náðir íhaldsmanna

Georgios Papandreou, forsætisráðherra Grikklands, hóf í gær tilraunir til að fá stærsta stjórnarandstöðuflokkinn, gríska Íhaldsflokkinn, til liðs við vinstri stjórn sína.

Nokkrir þingmenn Íhaldsflokksins hafa lýst stuðningi sínum við myndun þjóðstjórnar, en krefjast þess að Papandreou víki þá úr embætti forsætisráðherra. Sjálfur segist hann reiðubúinn til þess.

Papandreou hefur aðeins fárra vikna frest til þess að fá þingið til að samþykkja frekari aðhaldsaðgerðir svo ríkið geti staðið undir afborgunum af himinháum skuldastafla sínum.

Mikil og hávær andstaða hefur verið í Grikklandi við aðhaldsaðgerðir stjórnarinnar, sem þykja bitna harkalega á almenningi. Andstaðan hefur náð inn í raðir stjórnarinnar og nú í vikunni sagði einn þingmanna Sósíalistaflokksins skilið við stjórnina. Annar hefur þegar boðað að hann muni greiða atkvæði gegn aðhaldsaðgerðunum.

Óeirðir brutust út í Aþenu í gær með hörðum átökum bæði milli mótmælenda innbyrðis og milli mótmælenda og lögreglu. Meira en 25 þúsund manns höfðu komið saman fyrir utan þinghúsið í miðborginni til að mótmæla aðhaldsaðgerðum stjórnvalda.

Innandyra í þinghúsinu stóð Papandreou forsætisráðherra í ströngu við að afla fylgis við frumvarp sitt um enn frekari niðurskurð og skattahækkanir til þess að standa undir kröfum Evrópusambandsins og Alþjóðagjaldeyrissjóðsins.

Svo virðist sem hann hafi rekið í strand með það, og leiti því á náðir andstæðinga sinna um stuðning.

„Sá mikilvægasti í áhöfn hvers skips er skipstjórinn, og skipstjórinn þarf að fara,“ sagði Theodoros Karouglou, einn af þingmönnum Íhaldsflokksins. „Ef við tækjum saman höndum, þá gætum við farið saman til að semja við lánardrottna okkar og útkoman yrði að sjálfsögðu betri.“

Grikkland hefur fengið 53 milljarða evra, jafnvirði nærri 9.000 milljarða króna, í fjárhagsaðstoð frá ESB og AGS. Þetta er tæplega helmingurinn af þeim 110 milljörðum evra, sem þessar tvær stofnanir samþykktu í maí 2010 að veita Grikklandi. Ljóst þykir að þessi aðstoð dugi ekki, en ágreiningur er innan Evrópusambandsins um það hvaða skilyrði eigi að setja Grikkjum fyrir frekari aðstoð. Stefnt er að ákvörðun um það í næstu viku.

gudsteinn@frettabladid.is