Fjármálafyrirtækin fjármagni eftirstöðvar Icesave

Ef allt gengur að óskum má búast við því að Icesave frumvarpið geti komið til þriðju umræðu á Alþingi þann fimmtánda eða sextánda febrúar, samkvæmt upplýsingum frá Oddnýju Harðardóttur, formanni fjárlaganefndar. Nú fer í hönd svokölluð kjördæmavika þannig að ekkert verður unnið í málinu í næstu viku.

„Það verður sennilega fundur á mánudaginn fjórtánda febrúar. Þá gerum við ráð fyrir að fjárlaganefndin komi saman og ræði það sem útaf stendur. Það eru umsagnir viðskiptanefndar og efnahags- og skattanefndar og breytingatillagan sem framsókn er með," segir Oddný í samtali við Vísi. Umsagnir þingnefndanna tveggja snúast öðrum þræði um það hvort hægt sé að finna leið til að fjármagna þann kostnað sem hugsanlega mun falla á ríkissjóð vegna Icesave samkomulagsins með greiðslum frá fjármálafyrirtækjum. „Það er verið að skoða hvort það sé möguleiki að koma því við annað hvort í gegnum lög um innstæðutryggingar eða með aukasköttum," segir Oddný.

Oddný segir að það mál sem lúti að fjármögnun eftirstöðva Icesave skuldbindinganna sé eitthvað sem verði leyst hérna innanlands. „Þetta mál kemur ekki samskiptum okkar við Breta og Hollendinga við. Við getum gengið frá samningum við Breta og Hollendinga þó við vinnum áfram með þetta mál," segir Oddný í samtali við Vísi.